TUR TIL HALSAVATNET & NUKEN

Turoppsummering

Torsdag 16.10 klokka 16 møttes me uttafor skulen og fordelte felles utstyr, før me tok felles transport til Åsen, der me skulle gå ifrå. Klokka 17 byrjå me å gå mot Halsavatnet. Gruppa mi (Victoria, Stine, Sander og meg) skulle leie resten av klassen til Halsavatnet der me skulle finne leirplass. Me holdt eit jamnt tempo heile vegen, men me måtte plukke med oss ved på vegen til bålet me skulle lage på kvelden. Når me kom fram til Halsavatnet fann me ut at me ville finne leirplass litt lenger vest for vatnet, på grunn av mykje myrområde og vind ved vatnet. Me enda derfor opp sør vest for Halsavatnet, bak nokre kollar. Dette var ein veldig gunstig leirplass i forhold til vind og i tillegg var det ikkje så langt å gå ned til vatnet.

Me kjappa oss med å få opp teltet, slik at me kunne byrje på matlaginga før det blei mørkt. Alle på gruppa hadde med seg litt mat kvar, så lagde me kylling fajitas til middag. Litt seinare på kvelden satt me oss rundt bålet som ei anna gruppe hadde laga. Når me var ferdige med middagen var det ei anna gruppe som hadde laga bål (pagode bål). Det var ganske kaldt så det var godt å ha eit bål å varme seg rundt. Høgdepunktet denne kvelden var definitivt dei spennande spøkelseshistoriane...!

Rundt 22.30 gjekk me å la oss. Eg fraus veldig denne natta, så det var godt å kunne stå opp å bevege seg litt dagen etterpå. 

Litt over 9 byrja me på frukosten, omelett og bacon. Mens eg sat å steikte omelett, byrja dei andre på gruppa å ta ned teltet. Når klokka nerma seg 10, var dei fleste i klassen klare til å gå. 10. 30 kunne ein kald gjeng endeleg begynne på heimreisa igjen. Klassen tok ei avgjering i å ikkje stoppe på Nuken, men å ta lunsjen på Hylsete, sida me nettopp hadde ete frukost og det var mykje vind og kaldt på toppen. 

Gruppa som skulle leie oss ned til Hylsete fann ein veldig fin sti som me kunne følgje heile vegen, på den måten kom me oss kjapt ned til Hylsete. Der hadde me ein lunsjpause i ca. 30 min før me gjekk strake vegen ned på Kvåle, der me hang opp telta og vaska stormkjøkkena. Nok ein gong var ein vellykka tur gjennomført, og eg sit att med mange fine turopplevingar og erfaringar.

Turruta vår: Åsen - Halsavatnet - Nuken - Hyllsete - Åberge - Kvåle
Dag 1: ca. 2km
Dag 2: ca. 7 km 

Turplanlegginga - plan A
TORSDAG
1600 -Oppmøte
1700 -Gå frå Åsen
1800 -Framme
1900 -Leir klar, middag i gang 
FREDAG
0900 -Stå opp
1030 -Avreise
1115 -Nuken, mat
1200 -Avreise Nuken
1330 -Skulen
1400 -Utstyr klar, god helg!

Dette tidsskjemaet var noko me klarde å halde veldig bra på denne turen. Alle var klare når dei skulle, og me gjekk heile tiden i eit jamt tempo som holdt gruppa samla heile vegen. Eg trur grunnen til at me klarde å halde tidsskjemaet så bra denne gongen, var at me har blitt mykje flinkare til å bruke kart og kompass. Eg merka vertfall sjølv at eg brukte kartet mykje meir aktivt denne gongen, enn sist gong. Det er kjekt å kunne delta i beslutningar om kvar me skal gå, leirplass osv. 
På slike turar er det viktig at me har ein PLAN B og ein kriseplan. 
Plan B var at me hadde bil på Åsen som kunne nyttast, i tilfelle nokon blei skada. 
Kriseplanen vår var å ringje nødnummer eller eventuelt bruke plan B om nødvendig. Heldigvis fekk me kun bruk for PLAN A! 

Mål for turen og kva har eg lært?
Målet for denne turen var å lære å tenne opp eit bål, pakke ned leiren meir effektivt enn forrige gong og å læra meir om å vera på tur i haustfjellet. Noko me spesielt klarde veldig bra denne gangen var det å pakke ned leiren meir effektivt enn forrige gong. Denne gongen var me ferdige heile 30 min. før me skulle. Eg har også lært mykje om det å vere på tur i haustfjellet, noko som kan vere ein utfording med tanke på vër osv. Det var ganske kaldt desse dagane, så det var derfor viktig å ta ansvar sjølv for å halde seg varm. I tillegg har eg lært at det ikkje er lurt å kle på seg lag på lag med klede, for då blir det ikkje noko luft mellom laga og du blir lettare kald.

Kva var bra?
Det var veldig mykje positivt å ta med seg frå denne turen. Sjølvom det var ganske kaldt, syns eg alle var flinke til å gjere det beste ut av det. Torsdagskvelden koste me oss heile gruppa rundt bålet, noko som var veldig sosialt og triveleg. Eg likte spesielt at me var ei meir samla gruppe som var på tur no. Heile klassen var veldig flinke til og halde tidsskjemaet me hadde laga på førehand.
Kart og kompass syns eg sjølv eg meistra betre denne gongen enn forrige gong, noko som er veldig kjekt.

Kva kan bli betre?
Sjølvom det var veldig mykje positivt på denne turen er det alltid noko som kan bli betre. Gruppa mi for eksempel var litt dårlege til å rydde opp etter middagen. Då me skulle leggje oss stod det fortsatt igjen litt ting uttafor teltet som me burde ha pakka saman eller lagt i ytterteltet vårt. Dette er veldig viktig med tanke på at det kan kome dyr eller at det kan blåse vekk.
Noko anna eg gjerne ville vore ein del av på denne turen, er bålbrenninga. Det hadde vore kjekt å lært korleis ein laga eit bål i haustfjellet, så det er noko eg ville gjort annleis.
I tillegg ville eg ha kledd meg litt annleis når eg gjekk å la meg. Eg fraus ganske masse denne natta, så neste gang vil eg vertfall ha nokon tjukkare sokkar for å hindre å bli kald.
Til neste gang vil eg òg ha med meg eige kart og kompass.

Sanna tykte det var litt kaldt…

… men med bålkos på kvelden fekk me fort varmen !

Ankomst Halsavatnet, torsdag.

Teltet vårt, med fantastisk solnedgang i bakgrunnen.

Flotte naturopplevingar og ikkje minst minner!

Gonatt frå gruppe 1! 

God og vellykka frukost fredags morgon. 

Ein fin gjeng på Nuken, etter ein fantastisk, men kald telttur! 

BÅLBRENNING 29.09.14

Mandag 29.09 reiste me opp til Gammen på Rutlin for å lære meir om bål og bålbrenning. Då me kom opp var det to studentar som hadde laga ferdig eit bål til oss. Me fekk utdelt nokre ulike oppgåver. Nokon skulle samle never, mens eg, Rebekka og Stine fekk i oppgåve å lage ein "trefot". Dette var veldig spennande og lærerikt. Me skulle finne tre ganske kraftige pinnar på ca. 1,5 meter, før me skulle bitte dei saman med ein 8-talls "knute". Me brukte enda ein tråd til å feste panna i.

Dette er ein "trefot", som er veldig nyttig for at panna for eksempel ikkje skal velte på bålet. 

Deretter satt me oss rundt bålet og åt maten vår. Nokre grilla pølser, noken laga toast og i tillegg hadde me varma eple og kanel. Til slutt lærde me litt om ulike typar bål og ulike vedtypar. Bjørk for eksempel er veldig tettpakka og brenn derfor lenge. Bøk og Eik er dei vedtypane som gir mest varme. Når det gjeld matlaging bør du ha eit bål med jamn varme overalt. Skal du ha eit bål der du skal bake eller grille på bør du ha eit bål med glør.

Det finns mange ulike typar bål, men me lærte om vinterbålet. Vinterbålet skal vere veldig tettpakka, slik at det varer lenge. Det er oppbygd på ein spesiell måte med tjukke, rå stokkar i botnen. Over den tjukke veden finn me litt tynnare og tørrare ved som igjen er toppa med nøreved (tynne, tørre kvistar og tørr flis). På toppen av bålet skal det leggast spon flis av tørr ved, tørt granris og bjørkenever. Når me får eld i vinterbålet brenn det nedover, noko som gjer at det alltid har tilgang på oksygen.

Dette er eit vinterbål. 

MANNSVERK - FJÆRLANDSSETET - KOLLSETE

Turoppsummering

Måndag 15.09 møtte me opp på Kvåle for å fordele felles utstyr som stormkjøkken, telt og raudsprit, før me tok bussen vidare til Øvstedalen og Mannsverk. Her hadde me ei lita samling, der me fekk litt informasjon om vegen vidare og korleis dagen ville blir. Gruppa mi hadde fått i oppgåve å leie gruppa den første biten opp til Furusete. Me fann kompasskursen, såg litt på kartet og kor det var best å gå, før me sette i gang. I byrjinga følgde me ein traktor veg før me kom til ein sti. Me følgde stien heilt til me kom til eit stikryss. Etter litt diskusjon fann me ut at me tok stien til venstre, fordi stien mot Svartavatnet stoppa etter eit lite stykke. Heretter var det fin sti som me følgde heile vegen mot Furusete. På Furusete tok me ein times matpause før neste gruppe skulle leie oss til Fjærlandssetet. Her var det fin sti heile vegen, og på grunn av eit ganske høgt tempo i front kom me oss fort fram til Fjærlandssetet. Me fann ein fin leirplass nede ved vatnet og slo opp telta våre der. Eg har aldri slått opp eit telt før, men med eit godt samarbeid på gruppa gjekk dette fint. Deretter fekk me litt fritid før me byrja på middagen i 16-tida. Gruppa mi valde å lage taco, der alle hadde med seg noko. Stormkjøkken er noko eg ikkje har erfaring med frå før, så det var veldig moro å prøve ut. Etter middagen var det tid for litt orientering og ein quiz om kart- og kompass kunnskapar, noko som var veldig moro og lærerikt.

Utpå kvelden begynte det å bli litt kaldt, så eg, Synnøve, Ingvild, Sanna, Stine, Rebekka og Victoria tok med oss soveposar, litt godis, og ein kortstokk og la oss opp på ein kolle litt forbi leirplassen. Det var heilt stjerneklårt denne kvelden så me låg å såg på stjernene, i tillegg var me utan mobilar noko som var utruleg befriande. Litt seinare satt me oss rundt bålet med dei andre før me gjekk å la oss.

Tysdag 16.09 stod me opp etter avtalt tid klokka 08.00 og laga oss frukost på stormkjøkkenet. Mens jentene på gruppa (meg, Ingvild og Synnøve) steikte pannekaker og bacon, tok Jonas ned teltet.

Klokka 10 begynte me på turen ned igjen mot Kollsetestølen. På det første vatnet me kom til valde me å gå på venstre sida av vatnet, under Helleberget, fordi me fann ut at det vart kortare og me trengde ikkje å gå like mange høgdemeter. Me tok ein matpause like ved Fagreggji, før me gjekk ned til Kollsetestølen. Me valde litt feil sti, så me gjekk på frifot siste biten ned til stølen. Frå Kollsetestølen gjekk med på grusvegen ned til busstoppen på Kollsete.

Ein sliten gjeng kom tilbake til skulen i 14.30 – tida, der me vaska stormkjøkkena og hang opp telta til tørk.

Her er ruta der gruppa mi, leia resten av klasssen. 

Gruppa mi klar til taco, mandag ettermiddag.

Godt fornøgde etter å ha sett opp vårt første telt nokon sinne!

Ting som kan gjerast annleis

Viss det var noko eg ville gjort annleis på turen var det å lage ein litt enklare frukost enn pannekaker. Eg hadde med ein 1,5 liters flaske med pannekakerøre i sekken noko som var veldig tungt å dra med seg. I tillegg var det ei veldig tynn røre, noko som gjorde det vanskeleg å steike på stormkjøkkenet. Sekken var veldig tung frå før, så det er viktig og ikkje ta med seg unødvendige ting. Det er noko eg skal tenke på til neste gong.

Å lage pannekaker på stormkjøkken var "lettare sagt enn gjort"

Positiv ting eg vil fortsette med

Noko eg var veldig fornøgd med på turen var val av klede og sko. Eg hadde med meg akkurat nok med skiftekle og varme kle. Det var spesielt godt å ha ein tynn dunjakke å ha på seg på kvelden når det var kaldt. Sjølvom det var veldig varmt på dagen, så blei det veldig mykje kaldare utpå kvelden og på natta. Då var det godt å ha ullklede, turre og varme sokkar og ei varm hue.

Noko eg lærde

I løpet av denne turen har eg lært utruleg mykje om kart og kompass. Eg har lært å ta ut ein kompass kurs og i tillegg har eg lært mykje om ledelinjer og korleis ein kan bruke dei til å orientere seg i terrenget. Eg merka spesielt at det var mykje kjekkare å gå når eg kunne sjå på kartet kor me var, og i tillegg bruke kompasset til å ta ut kompasskurs. Det at ein legg på 20 min for kvar 100 høgdemeter var òg noko eg lærde på turen. 

Alt i alt ein veldig fin tur, der eg lærte mykje og fekk mange fine turopplevingar :)